Koldo Amestoyren sorkuntza berria

Koldo Amestoy sorkuntza berri batekin datorkigu. Irudia eta hitza; kantua eta musika uztartuz labirintoen barrena abiatuko da. Publikoa ere ikuskariaren parte bihurtuko da, mugimenduan eta joan jarriz parte hartuz. Espazio ezberdinetan eskaintzeko pentsatu da. Ikuskariak ez du izango formatu bakarra. Ikuslea labirintoan barrena gonbidatuko du kontalariak, edo kanpotik begira dezake. Labirinto eta joko ezberdinak hauta daitezke. Berak azaltzen digu:

 Koldo Amestoy-ek kontakizun batekin ongietorria egin eta gero, saioan zehar, hau sustatzeko eta gidatzeko bezala, ipuina kondatzen segitzen du. Ibilaldi hori kontalariaren hitzak lagunduko du beraz, parte-hartzaileen kantuek, edo zuzeneko musika batek, adibidez.

Lau hautu proposatzen dizkio kontalariak publikoari:

Lehenengo hautua:Emaitza.

Lehendabiziko hautua - emaitza : Parte-hartzailea labirinto horretan bakarrik sartzen da eta bideskatik doa. Pistaren alde bateko edo besteko gune batean « bere harria eraikuntzari » (ur-harri bat, adreilu, liburu ttipi, oinetako, egur puska, CD, edozein pote edo botila…) temaren arabera berak ekarri puska lurrean ematen du, labirintoaren apailamendua burutzeko, eta aldi berean, bere emaitza « eraikuntzari », edo elkarte antolatzaileari ekarpen gisa uzteko.

Bigarren aukera - trukaketa : 

Beste « joko » bat asmatu daiteke berdin : ibiltariak labirinto itzulia segitzen duelarik, aldi honetan, bakoitzak bere « harria » pista bazterrean utzi eta gero, bere bidean aurkituko duen « beste » bat hartu eta eramaten du. Orduan, saio hau « puska truke » joko bat bezala bilakatzen da (liburu trukaketa, adibidez). 

Hirugarren hautua – hitza ematea :

 Ibiltariak labirintoan gaindi bere itzulia egin eta gero, besterik ez badu egin ere, ateratzerakoan mikrotik hitzegitea eskatuko zaio. Ahalaz EUSKARAZ, kontatu, irakurri, kantatu, erran edo, hainbat esalditan eskainiko du ipuintxo bat, slam, anekdota, bertso, olerki, errezeta bat, etab.

Laugarren aukera : gauazko saioa :

 Labirintoa lurrean markatua dago, ilunpetan edo ilunantzean dagoen espazio batean. Antolatzaileak eman dion kandelatxo bat sargian piztuta, ibiltaria sartzen da, hau eskutan. Gero bideska bazter batean uzten du, obra osatzeko eta azkenean, beste ibiltariekin batera labirintoa bere osotasunean argiztatzeko asmotan. Hautabide hau osatu daiteke… « hitza ematea » hirugarren aukerarekin. In girum imus nocte et consumimur igni !  

Proposamen interesagarria inondik inora. Orain bertan parte hartzea besterik ez zaigu geratzen. Izango dugu non. Informazio gehiago nahi duenak hemen ikus dezake:  www.koldo-amestoy.com

Itziar Rekalde Bartzelonan

Itziar Rekalde kontalari bermeotarrak urtarrileko asteburuetan Bartzelonan aurkeztuko duu bere azken kontaketa ikuskaria Bidaiek ez du itzulerarik. La Casa dels contes aretoan bidaiak aitzaki duen ikuskariak hiru kontakizunekin osatzen da galdera bat dutelarik ardatz, Itzultzen den bidaiaria abiatu zen berdina ote da? Hiru pertsonaien bidaia kontatuko ditu Itziarek. Iñaxio Estutu Batuetara XXmende hasieran joandako euskal artzaina da; Ibrahim Euskal Herrira heldu da Ruanda-Zaire gatazkatik ihes; Fatima pateran heldutako emakumea da hitzartu ezkontza batetik ihes. Hiruretan beldurra, bakardadea, deserrotzea eta itxaropena izango dira euren bizitzan nagusi. Norabanakako istorioak baina guztiona ere. 

Euskal kontalaritzak jarraitzen du gure mugaz kanpo bere proposamenak eskaintzen, euskal kulturak ekoizten dituen sormen lanen ordezkari ere.

Ahots Baten Sormen topaketak 2016

Urteko azken astean burutu ziren Ahots Baten Sormen Topaketak Zestoan. Bigarren urtea da gazteak elkartu eta sormen bide ezberdinak arakatuz. Literatura, kontalaritza, bertsoa, musika eta antzerkia landu dituzte lau egunetan, sormenari bideak zabalduz eta bere osotasunean garatuz. Aurten 38 gazte bildu dira 17-20 urte bitartekoak, guztiak ikasteko grinarekin eta euren sormenari, norbanakoa zein kolektiboa,
hegalak jarri nahirik.
Topaketen azken aurreko egunean bertso poteoa egin zen Zestoako kaleetatik Miren Amuriza eta Julio Sotorekin batera egonaldian parte hartutako beste gazteekin. Ondoren, bersto bazkaria Sastarrain Aterpetxean, gazteen parte hartzearekin ere, ez bakarrik bertsotan baina baita antolamentuan ere. Ikastea zerbait aspergarria ez denaren froga. Ikasi sortzen, sortzen ikasi, hori litzateke topakete hauen ardatza.
Mintzola Ahots Lantegiarekin batera Bertsozale Elkartea, Ikastolen Elkartea, EHAZE (Antzerkizaleen elakrtea, Kantuzaleen elakrtea eta kontalariak aritu dira antolamentuan. Guztientzat esperientzia arras interesgarria suertatu da, gazteekin halako lana egitea etorkizunera begira fruitu interesgarriak eman ditzakeelako. Datorren urtean segida izango duela ziurtau ondoren, orain urtea zehar antzeko sormen guneak eta topaketak egiteko aukera aztertu beharko da.