IRATI GOIKOETXEAK IRABAZI DU IV IPUINEN AHOZKO NARRAZIO LEHIAKETA

            Ordizian eta Tolosan Intujaik antolatzen duen Ahoz-Ahoz nazioarteko Ahozkotasun Jaialdiaren barruan egiten den Ipuinen Ahozko Narrazio Lehiaketak Irati Goikoetxeak irabazi du, Itziar Diaz de Ojer eta Nagore Leon, beste bi finalistei aurrea hartuta. Jaialdiaren ikurra den kalabaza jaso zuen epaileak eta publikoaren iritziaren ustetan ipuina ondoen eskaini zuen goierritarrak. Ordiziako Barrena jauregian egin zen lehiaketaren finala; klasifikazioa, berriz, Ordizian bertan dagoen D’elikatuz gunean egin zen aukeztutako sei kontalariren artean. Euskal Herrian bakarra den lehiaketak laugarren edizioa bete du aurten eta Ahoz- Aho jaialdiaren egitaruan ekitaldirik arrakastatsuenetakoa bihurtu da.

            Lehiaketaren finalarekin batera eta epaila jakitera eman bitartean Ahozkotasunaren Gala ospatu zen, Euskal Herriko kontalariekin batera, Nelson Calderon kolonbiarrak eta Maria Buenadicha kanariarrak, aurtengo nazioarteko gonbidatuetako bik, parte hartu zutelarik. Kontatzeko estilo ezberdinak eta istorio ederrak entzun ziren publikoaren gozamenerako. Honela Ahoz-Ahoz Nazioarteko Ahozkotasun Jaialdiak bere bederatzigarren edizioaren amaierara heldu zen Ordizian, larunbatean Tolosan hurrengo urtera arte despedida ospatuko dela.

MUNDUKO KONTALARITZAREN EGUNA

Martxoaren 20an ospatu ohi da Munduko Kontalaritzaren Eguna, udaberriaren hasierarekin. Egun horretan munduko hamaika zokotan kontalariak elakrtu eta euren istorioak eskaintzen dituzte kontalaritzaren aldarrikapena eginez. Urteko lema bat izan ohi da, kontakizunen abiapuntu gisa, aurtengoa "Emakume indartsuak" dugu. Norberak ulertuko du bere kasa lema, baina ezin ukatu kontalaritzaren biziraupenean emakumeek izan duten garrantzia, ipuinak denboran barrena transmitituz. Kontu zaharretan ere emakume ugariren istorioak kontatzen dira, euren abilidadeekin, jakinduriarekin, ausardiarekin aurrera egin dutenak. 

Euskal Herriak ere ospakizun honetan parte hartuko martxoaren 20an, igandea, Errenteria/Oreretako Mikelazulo elkartean kontaketa kolektiboa antolatuz helduentzat, 20:00etan. Euskaldunok tradizio luzea dugu ipuinekin. Aspalditik hasi ziren gure kontu zaharrak biltzen, eta ipuinen ahoz ahoko transmisioa ahul heldu bada gure garaietara, kontalaritza berriak ahanzturaren kontrako bidaia hasi zuen duela urteak. Munduko Kontalaritzaren Eguna okasio ederra da ahozkotasunaren gure altxor hau aldarrikatzeko eta zabaltzeko.

AHOZ AHOZ JAIALDIA

Martxoak 12 larunbataren kronika

Egunon batekin hasi genuen larunbata Tolosako Triangulo plazan. Bertan Intujai familia (May, Bea eta Alai)  eta Monika Klose rekin bertan elkartuz. Eguerdirako bazkaltzeko lekua izango genuen tokian zita jarriz.

Bazkalorduan, tertulia atseginean egon ginen bakoitzak bere kontuak kontatuz eta elkar ezagutzen hasiaz, tertulia eta mahai inguru hauek ere Ahoz Aho jaialdia egiten baitute. Bertako kontaketak, gertaerak eta elkar ezagutzeak batak besteak betetzen baitu.

Arratsaldeko saioa dotorea izan zen. Barrena Jauregiko gela goraino beteta. Gaztetxo kontalariak fin ibili ziren beraien ipuinak kontatuz. Taldeka eta taldean ipuinak kontatuz. Ondoren Monika Kloseren txanda tokatu zen. Ederki asmatu zuen denak nola harrapatu bere kontaeran. Gaztetxoak ere gustura zeuden ipuinetan sartuta. Berak kontatu ahala entzulea partaide eta laguntzaile zuen. Monikak giro ederra utzi zuen eta ondoren zetorren Iñaki Agirrezabalak ere gustura utzi gintuen. Bere kontatzeko era ganberroa eta bereziaz gozatuz.

Arratsaldearen bukaeran kontaketa berezia genuen. Ipuinek magia dutela beti esan da eta Ordizian bizi genuena magia izan zen. Kasu honetan hiru artista genituen: Diego Calavia, Jon Zabal eta Asier Kidam. Beraiek gertuko magiarekin txunditua utzi zuten Ordiziako kaleetan zebilen jendea. Bakoitzak bere estilo propioan maisutasunez jendearen harridura aurpegiak atereaz. Oraindik ere jendea pentsatzen egongo da nola lortu ote zuten karta asmatzea, eraztuna aroaren barruan sartzea edo dado txaponak esku batetik bestera bidaiatzea.

Afal ordua eta tertulia ere atsegina eta bikaina. Bertan elkartu ginen bai kontalari, Magoak eta lagunak. Egunak gauza asko eman zizkigun baino motza egin zen. Gustura geundenaren seinale.

Imanol Arabaolaza

AHOZ AHO JAIALDIA MARTXAN

Bete betean ekin dio Ahoz Aho Nazioarteko Ahozkotasun Jaialdiak. Pep Bruno kontalari espainiarraren emanaldia eta ikastaroarekin irekiera egin ostean Tolosan eta Ordizian antolatzen den jaialdia lehenengo emanaldiekin hasi da, Martxoaren 19ra arte luzatuko den ahozkotasunaren festa. Espazio ez ohiko batean haurrei zuzendutako emanaldia eskaini da Tolosako Minimaliak dendan. Enaitz  eta Mertxe Aizpurua kontalariak euren ipuinak eskaini dizkiete denda bete duten haur eta gurasoei. Liburu, jostailu eta bestelako apaingarri ederrez inguratuta kontakizunak haurren arreta erakarri dute, eguraldiaren okerra ahaztuz eta piratak bihurtuz. 

Haurren txanda pasa eta gauean Tolosako Amaroz auzoan hasiberrien txanda izan da. Imanol Arabolaza eta Ekaitz Goikoetxea aurreko urteko Ipuinen ahozko Narrazio Lehiaketara aurkeztu ziren eta aurten jaialdiak aukera eman die lehiaren presiorik gabe euren kontakizunak jende aurrean aurkezteko. Bi estilo ezberdin, kontaeran zein ipuinen aukeraketan, baina bildutako publikoaren oniritzia jasotakoak. Sumatzen zitzaien, jakina, hasiberriak izatearen ajeak, urduritasunak eta experientzia falta, baina horrela egiten da bidea. Primerako ideia da Intujai Talde antolatzaileak izan duena, beharrezkoa baita kontaketa jaialdietan hasiberriei ere euren espazioa eskaintzea, jende aurrean eskarmentua hartzeko aukera izatea, eure buruekin topo egitea kontaketa ikuskari bat aurkezterakoan eta publikoari eskaintzerakoan. Eta biek pasa dute froga, noski hobetzeko hainbat gauzekin, baina bidea hasiz. Orian beren esku dago bidea jorratzea, proposamen gero eta landuagoak eskaintzea eta kontalaritzari aire berriak ekartzea. 

Larunbatarekin IV Ipuinen Ahozko Narrazio Lehiaketa izango da Ordizian. Bertan ere kontaketaren bidean jarri nahi duten lehiakideek euren sormena eta abilidadeak erakutsi beharko dituzte; baina batez ere, istorio bat izango dute ahoan. Ahoz aho eskaintzeko.

ITZIAR REKALDE ELTXEN

Euskal kontalariak gure mugaz haratago euskal kontagintzaren proposamenak eraman ohi dute, uste baino gehiagotan. Oraingoan Itziar Rekalde bermeotar gasteiztartuak Pais Valenciá aldera joan zaigu Eltxeko (Alacant) Festival Internacional de la Oralidad 2016 jaialdian parte hartzera. Kontaleta emanaldiez gain ikastaro bat ere eskainiko du asteburu honetan (martxoak 4, 5 eta 6) "Narrazioaren baliabide eszenikoak" izenburupean. Berri ona da euskal kontalariak halako jaialdietan parte hartzea gure kontagintzak zer eskaini erakusten baitu. 

KONTAKATILUKETAN

Egitasmo interesgarria eta polita Pasaian (Gipuzkoa) aurrera eramaten ari direna: haurrak haurrei ipuinak kontatzea. Hiru egunetan eta Pasaiako distrito ezberdinetan 12-13 urte arteko zazpi nerabek 8-9  urteko haurrei  aurretik kontalari batekin prestatutako ipuinak kontatuko dizkiete. Egitasmoa Badia Eskolak landu du eta Maider Galartza kontalari irundarrak izan da irakaslea. Joan den urtean hasi zuten ibilbidea nerabeei kontaketaren nondik norakoak irakasteko asmoarekin, eta bide batez euskararen erabilera sustatzeko. Herriko lau liburutegietan eskainiko dituzte saioak martxoaren 8 eta 15ean (Donibane eta San Pedro), eta apirilaren 5 eta 12an (Antxo eta Trintxerpe), beti 18:00etan. Informazio gehiago hemen: 

Kontakatiluak